Loron matan dader nian hafalun hosi Loelaco tutun, anin fresco laletek Lugululi nian acompanha estudantes Finalista Colégio Infante de Sagres Maliana ba exame nacional. Estudantes finalista sira hanano Hino Nacional Patria no Mars Colégio Maliana hodi loke atividade exame nacional.
Segunda ida ohin, la hanesan segunda feira baibain iha Colégio Maliana. Ambiente hakmatek liu duque loron sira seluk, estudantes sira apresenta aan ho farda nebe kaber no jeito iha loron segunda-feira nian. Anin fresco dader nee lori mos conflito iha estudantes sira nia oin. Hakmatek, maibe mos nakonu ho conflito interior. Sentimento tauk kahur ho esperança no fiar aan, hafalun ho oração nebe sai hosi sira nia fuan atu bele sucesso iha exame nacional 2025.
Iha mundo ohin loron nebe pragmático liu tan buat hirak nebe apresenta iha leten, sai hanesan alarma forte ida ba ita, katak: Educação lolos, laos deit konaba atu hetan valor, maibe konaba formação carácter. Iha Colégio Maliana estudantes sira hatoman aan ona katak, buat hotu tem que hahu no remata ho oração. Sira forma laos deit atu hetan formatura ida nebe iha ordem, maibe ho fuan ida nebe dirigi ba lialos no honestidade. Iha sira nia nonok, parece sira nia kakutak nakonu ho formula no teoria sira, maibe ida nebe importante liu mak buat nebe tubun iha sira nia néon: integridade, responsabilidade, humildade no virtude sira seluk.
Exame final sei acontece iha semana ida nia laran, maibe exame konaba moris sei acontece nafatin iha sira nia vida tomak.
Iha diferença boot entre passa exame tambá sira nia luta ho ida nebe passa tambá dalan terik. Iha fatin barak tambá preção académico dala barak halo valor sai ida nebe importante liu, dala ruma mos sacrifica honestidade no integridade. Hosi Colégio Maliana, mensagem nee claro: luta ba futuro ho matawen no kosar duque halo buat nebe lakon dignidade.
Ema barak hanoin katak desafio boot liu ba estudantes sira mak decor no domina matéria sira. Na verdade, desafio nebe boot liu mak wainhira ema hasoru tentação, ema bele haluha tiha principio wainhira hasoru dificuldades. Tan nee exame laos deit questão académico maibe hanesan rito ida atu forma moral no caracter. Wainhira estudantes ida kaer lápis ou caneta ida ho nakdedar, laos deit prova ba saída mak nia hatene, nia domina no decor, maibe liu hosi ida nee ninia coragem no nia fiar aan.
Colégio Maliana fiar katak, Nação ida nebe boot no forte tem que hatur iha geração ida nebe laos deit hatene fo resposta ba perguntas exame nacional, maibe ida nebe iha coragem atu decide ho fuan nebe mos no justo.
Iha nee mak educação hetan nia sentido nebe los: prepara ema atu hasoru realidade moris nian, laos ba deit questão sira iha suratahan leten.
Exame nacional sei termina. Resultado sei anúncio. Buat hirak nee hotu sei passa, sei liu. Maibe iha valores sira nebe sei hela ba nafatin: disciplina, oração, honestidade, responsabilidade, humildade, respeito ba processo.
Aban bainrua, estudantes sira nee sei lao iha mundo ida nee, parece sei hasoru problemas nebe boot no complicado liu folhas resposta exame nacional. Maibe ema nebe apreende loron ohin ho honesto ba buat nebe kiik, loron ida sei hasan knaar nebe boot liu ida nee.
Hosi Colégio Maliana, hasae hela mensagem ida nee ba mundo educação: possibiliza ita nia oan sira laos deit experto iha números no letras, maibe no liu-liu experto atu lori aan ho digno no integridade. Tambá exame nebe los, laos acontece iha sala de aula, maibe iha viagem moris loloron nian.
Colégio Maliana, 20 de outubro de 2025
Pe. Norberto Soares – Diretor Colégio Maliana
Leave a Reply