Discurso Diretor Colegio Maliana ba Exame Nacional 2025

Oan doben 12 ano sira nebe hau hadomi no estima, geração esperança Timor nian,
Loron ohin ita too iha ponto importante ba imi nia processo formação no educação iha fatin ida nee hodi hahu Exame Nacional.

Imi barak mak reza, estuda, kalan les matan durante semana hirak ikus nee.
Tan nee, hau husu licença atu hatoo buat hirak nee ho fiar aan: loron ohin laos deit hasoru exame nacional, maibe imi ididak sei hasoru imi nia aan rasik – imi nia coragem, disciplina no honestidade.
Exame nacional (final) sei acontece deit durante loron hirak ba oin, maibe exame lolos konaba moris, sei acontece durante imi nia moris tomak.
Se loron ohin mak imi apreende fo resposta ba perguntas exame final sira ho calma no honesto, aban bairua imi mos sei bele hasoru decisões  sira nebe importante ba imi nia moris ho integridade no coragem.
Diak liu falha iha exame tambá honestidade, duque sucesso tambá lakon dignidade, Colégio maliana ninia qualidade laos deit sukat ho valeres iha diploma, maibe liu-liu sukat ema ho nia carácter no dignidade hosi estudantes sira nebe remata iha escola ida nee.

Oan doben sira,
Ita hotu hakarak hetan resultado nebe diak ba ita nia exame, maibe ida nebe importante liu mak nia maneira atu hetan valor nebe diak nee. Fiar ba katak: Maromak sei fo bênção ema nebe luta duni, laos deit hakarak.
Tan nee, hau hameno mensagem tuir mai nee:

1. Tama ba sala de exame ho oração, laos ho tauk. Wainhira imi tauk, sei halo imi bele haluha buat hotu. Ho oração sei halo imi nian fuan hakmatek no kakutak calma atu tuir exame.
2. Exame ho honesto no fiar ba o nia capacidade rasik. Colégio Maliana nian identidade mak integridade.
3. Hanoin ba: ida nee laos fim, maibe ida nee hanesan início hosi imi nia moris nebe luan no boot lu. Liu tiha exame ida nee, imi nia moris sei lori nia exame rasik ba imi,- laos ona konaba formula no teorias sira, meibe liu-liu konaba moris mesak, responsabilidade ba imi nia vocação moris nian. Prepara imi nia aan ba ida nee!

Hau nia oan doebn sira nebe hau tau laran,
Hamotuk ho professores sira hotu, inan aman sira no família boot Colégio Infante de Sagres Maliana, ami hotu iha imi nia kotuk iha exame ida nee.
Loron ida ohin, ami laos deit hein resultado, maibe no liu-liu hein hela atu moris, atu tubun  hosi imi geração foun, nebe matenek, iha coragem no iha dignidade.
Luta ba ho oin nebe foti los, néon nebe mos no espirito nebe lakan makaas.

Nain Feto Ramelau Lugululi ita nia inan hamotuk ho Jesus Futar Fuan santo sei hamahan imi ididak iha exame ida nee.
Ho fiar aan, ho fé, ho coragem, ho disciplina, hatudu imi nia aan ba katak imi mak oan feto no oan mane lolos hosi Colégio Infante de Sagres Maliana, futuro liderança ba rai no creda Timor Leste.

Bao exame

Pe. Norberto Soares – Diretor Colegio Maliana