Maliana, 29 de agosto de 2025
Professores Colégio Maliana participa iha Workshop ho nia tópico “Introductory Workshop on Contextual Teaching and Learning Mastery (CTLM)”. Workshop ida nee fo hosi Bali Business School – BBS, nebe lidera hosi Dr. Mirsa Umiyati, S.S., M.Hum, CEO Bali Business School. Workshop ida nee bele realiza tamba serviço hamotuk entre Fundação Sagrado Coração de Jesus Maliana – FSCJ no Bali Business School – BBS. Participantes hosi Workshop nee, mai mos hosi professores Pré-escolar no Ensino Básico Central Sagrado Coração de Jesus Maliana. Total participantes iha professores 54. Workshop nee halo iha Salão Betânia Training Center (BTC) Maliana, iha loron sexta-feira, dia 29 de agosto de 2025, hahu hosi tuku 9 dader no remata iha tuku 5 lokraik.
Pe. Norberto Soares, Presidente FSCJ haktuir katak Workshop ida nee hanesan programa hosi Fundação nian atu hasae capacidade professores sira nian atu bele hanorin diak liu tan. Workshop ida nee hola parte iha ‘on going formation’ ba professores sira hotu. Workshop ida nee hanesan parte inicial ida atu bele hare possibilidade serviço hamotuk entre FSCJ ho BBS iha tempo sira tuir mai. iha posibilidade rua nebe nakloke, equipa hosi BBS mak mai fo formação iha Maliana ou bele mos Profesores sira hosi Maliana mak ba tuir formação iha Bali.
Participantes sira contente hodi hola parte iha Workshop ida nee, hodi hamoris no hafoun hikas método contextual atu hanorin estudantes sira. Sira sei ba aplica buat hirak nebe sira aprende ba sira nia sala de aprendizagem.
Equipa BBS sei halo avaliação ba participantes workshop nee, no sei halo recomendação ruma ba FSCJ konaba continuação workshop ba professores sira.
#Equipa Media
Leave a Reply