Colégio Infante de Sagres Maliana hola parte iha iha historia naruk Educação iha rai no missão Bobonaro. Missionário sira hari uluk escola ida iha “Gueluboe” Bobonaro, tambá situação nebe la permite, sira decide atu muda escola nee mai iha rai Maliana iha dia 14 de outubro 1948. Dom Jaime Garcia Goulart hamutuk ho governador Oscar Ruas mak iha iniciativa atu loke colégio infante de Sagres Maliana. Colégio diak ida atu bele serve ba povo sira iha fronteira, hahu hosi Batugade ba too Suai. Padre Martinho da Costa Lopes mak realiza hanoin bispo no governador nian nee hodi loke Colégio Maliana. Colégio Maliana muda mai iha Lugululi iha dia 12 de outubro 1950.
Colégio Infante de Sagres Maliana funciona durante tempo português nian too mai iha 1975. Too mai 1980, colegio infante de sages maliana la funciona. Iha 1981 mak Padre Verbitas – SVD sira hahu ativa hikas Colégio Infante de Sagres Maliana. Iha momento ida nee mak feto sira mos bele mai escola iha Colégio Maliana. Colégio Maliana hahu fila fali hodi simu estudantes SMP, liu tiha tinan tolu continua formação ba professores ou SPG. SPG funciona durante tinan tolu nia laran, depois transforma ba SMA ou secundaria geral. Colégio Maliana funciona too 1999. Liu tiha ida nee, iha tinan 2000, colegio Maliana hahu hikas no funciona too ohin loron. Iha tinan 2010, Diocese Maliana hamrik, no iha tinan 2014, Bispo Maliana hamutuk ho padres SVD decide hodi entrega Escola Colégio Infante de Sagres Maliana ba Padres Diocesano sira mak hamatan.
Iha 2017, Bispo Maliana decide atu loke Seminário Menor Maliana nebe nia fatin iha Colégio Maliana.
Ba daudaun nee, Colégio Infante de Sagres Maliana iha nia internato tolu. Ida ba Seminaristas, ida ba internato feminino no ida seluk ba internato masculino.