BOBONARO, 07 outubru 2023 (TATOLI)—Colégio Infante de Sagres Maliana, sábadu ne’e, selebra ezisténsia nu’udar eskola Katólika iha Timor-Leste ba dala-75 ho tema ‘75 anos ba rai no ba lalehan hola fatin iha Colégio Infante de Sagres Maliana’.
Selebrasaun ne’e hahú ho misa, ne’ebé prezide hosi Bispu Dioseze Maliana no atuál Prezidente Konferénsia Episkopál Timorense, Dom Norberto do Amaral.
Dom Norberto, hateten, ezisténsia Colégio Maliana hanesan ema ida karik idade ona, maibé konsege halo buat barak tanba to’o ohin loron susesu forma ema lubuk sai membru Governu, deputadu, bispu, padre no madre hodi kontribui sira-nia kapasidade hodi serví uma kreda no dezenvolve nasaun.
“Maun alin sira hotu, ho festa 75 anos ne’e, fó hanoin mai ita atubele hateke ba kotuk buat hirak mak ita halo ona, hira ona mak ita la’o mai to’o momentu ida-ne’e, buat barak loos, ita konta mak la to’o, konta mós la hatene, maibé tan de’it Na’i Maromak nia grasa ida-ne’e, halo ita sei moris no ohin selebra aniversáriu 75 koléjiu ida-ne’e,” Dom Norberto, dehan, liuhosi ninia omília, iha aldeia Lugululi, suku Manapa, postu administrativu Cailaco, munisípiu Bobonaro.
Biban ne’e, Diretór Jerál Colégio Infante de Sagres Maliana, Padre Norberto da Conceição Soares, reforsa, selebrasaun misa ne’e atu fó omenajen ba Dom Martinho da Costa Lopes, ne’ebé harii eskola ne’e hamutuk Amu-lulik sira seluk no ekipa formadór sira durante iha tempu portugués, indonéziu to’o ukun-an.
“Ba matebian sira, eroi edukasaun sira ne’e hotu, ita-nia omenajen ba sira hodi hato’o mós apresiasaun ba padre, madre, profesór, funsionáriu no ema hotu ne’ebé dedika sira-nia an ba dezenvolvimentu instituisionál Colégio Infante Sagres Maliana,” nia akresenta.
Biban ne’e, Padre Norberto agradese ba IX Governu inklui instituisaun Estadu sira hotu no ema hotu ne’ebé ho laran luak fó apoia materiál no orsamentu ba selebrasaun festa tinan 75 koléjiu.
Eskola Colégio Infante de Sagres Miana harii iha tinan 1948, iha tempu Dom Martinho da Costa Lopes no nia edifísiu hetan restaurasaun totál iha tinan 2015-2016 hosi Orsamentu Jerál Estádu, iha mandatu Primeiru-Ministru, Kayrala Xanana Gusmao.
Selebrasaun ne’e partisipa hosi Primeiru-Ministru, Kay Rala Xanana Gusmão, akompaña hodi Vise Primeiru-Ministru, Ministru Koordenadór Asuntu Sosiál, no Ministru Dezenvolvimentu Rurál no Abitasaun Komunitária, Mariano Asanami Sabino, inklui membru Governu sira hanesan Ministru Ensinu Superior Siénsia no Kultura, José Honório da Costa Pereira Jerónino no Ministra Edukasaun, Dulce de Jesus Soares.
Vise-Ministru Administrasaun Estatál, Jacinto Rigoberto, Vise-Ministru Komérsiu no Indústria, Agostu Junior Trindade, Vise Ministru ba Fortalesimentu Instituisionál Saúde, José dos Reis Magno, Sekretáriu Estadu Komunikasaun Sosiál, Expedito Dias Ximenes, no seluk tan. Partisipa mós hosi Vise Xefe Estadu FALINTIL Forsa Defeza Timor-Leste, Majór Jenerál, Calisto dos Santos ‘Coliati’, membru deputadu balun, antigu alunu koléjiu, fámilia no konvidadu sira.
Jornalista : Sérgio da Cruz
Editora : Julia Chatarina
Fontes Notísia : https://tatoli.tl/2023/10/07/dom-norberto-tinan-75-colegio-maliana-halo-buat-barak/
Leave a Reply