SECOMS LANSA RÁDIO KOMUNIDADE FRONTEIRA BALIBO 5 IHA BALIBO

Balibo, 15 de Outubro 2025 – Secretário Estado Comunicação Social(SECOMS) halo inaugurasaun no lansa ofisiálmente Rádio Komunidade Fronteira Balibo 5 ho nia Frekuensia 98.3 mhz, iha Postu Balibo, Municipio Bobonaro. Atividade ida ne’e parte husi programa ba selebrasaun 50 aniversáriu jornalista nain lima ne’ebe mate iha Balibo iha tinan 1975.
Iha serimónia inaugurasaun no lansamentu ne’e, SECOMS Sr. Expedito Loro Dias Ximenes hatete katak instalasaun rádio komunidade iha Balibo  atu kontínua promove komunidade nia servisu no aumenta partisipasaun komunidade.
“Rádio Komunidade Fronteira Balibo 5 sei sai linha frente no  meius hodi partilha informasaun kona ba liu liu iha agrikultura, no dezenvolvimentu komunidade, importante atu ema Balibo,  iha área fronteira, bele fahe informasaun ne’ebe diak, e iha parte seluk mos atu fo informasaun ne’e 40% ba governo ka estadu, no 60% ba komunidade nian, liu liu iha agrikultura nian husi komunidade sira” haktuir SECOMS.
Rádio ne’e sei funsiona ho sistema Radio Online, hodi bele atinje audiénsia la’ós deit iha Balibo maibé mos iha parte seluk iha teritoriu Timor-Leste no mos rai liur bele akompanha informasaun.

Iha sorin seluk Representante Presidente Autoridade Municipio (PAM) Sr. Julio Carvalho Caero nu’udar Secretario Autoridade Municipio Bobonaro Asunto Sociais, hato’o agradese ba SECOMS ho apoio Radio Komunidade Fronteira Balibo 5 ne’ebe existe,hanesan meius ida ne’e atu informa ba komunidade sira atu bele rona lian desenvolvimentu iha oras ne’ebe determina, bele asesu no sei utiliza tuir benefisiu ne’ebe iha.
Atividade ne’e mos halibur jornalista sira, professores no lider komunidade sira atu hamutuk hanoin kona ba memoria importante jornalista nain lima, ne’ebé lakon sira nia vida bainhira halo servisu nudar joranlista iha Balibo, iha tempu invazaun.
Iha serimónia ikus lansamentu nian, Rádio Fronteira Balibo 5 halo Talk Show hamutuk ho SECOMS no APA Balibo hodi fó hanoin no mensagem inspirativu ba komunidade no joven sira oinsa atu uza Radio ne’ebe iha ho diak hodi transforma no akompanha informasaun sira ho diak.

By: Aida Media Colégio