Uluk knanain la haluha agradece ba Maromak ba graca moris nian no mos ba nain Feto Ramelau Lugululi nia mahan, ohin loron ita bele halibur hamutuk iha fatin ida ne,e.
Hamriik iha nee, nu’udar reprezentante husi ami-nia turno ba tinan academico 2025 , ha’u hola liafuan atu partilha, hodi estudante graduado sira hotu nia naran, ami-nia esperiénsia no ami-nia agradesimentu sinseru ba edukasaun no formação ne’ebé ami simu durante tinan tolu iha eskola sekundária Colegio Infante de Sagres Maliana .
Eskola Colegio Maliana nia objetivu fundamentál mak atu eduka estudante sira sai ema ne’ebé preparadu hodi serbí nasaun no Igreja. Durante tinan tolu, ami la’ós de’it hetan edukasaun akadémika, maibé mós iha domíniu humanu, morál no espirituál.
Durante ami nia formação , ami aprende valór lideransa, disciplina, no serbisu iha ekipa. Akadémikamente, ami hetan dezafiu oioin atu estuda ho responsabilidade no ho dedikasaun, hodi dezenvolve abilidade sira ne’ebé sei prepara ami ba futuru. Ami aprende mos atu hanoin ho krítiku no hasoru dezafiu sira ho maturidade.
Aleinde ne’e, ami hetan edukasaun kona-ba valór humanu sira, aprende importánsia husi haraik-an, responsabilidade, no maturidade. Hanorin sira-ne’e prepara ami atu sai cidadão ida ne’ebé iha consciência, comprometido ho sosiedade no iha kapasidade atu asume ami nia papél ho étika no dignidade.
Entre buat hirak nee hotu (…) Fe mak sai ponto principal no centro durante tinan tolu iha ami nia caminhada. Liuhusi momentu orasaun, selebrasaun eucaristia, no atividade espirituál sira seluk , ami hametin ami-nia relasaun ho Maromak no aprende atu moris tuir valór kristaun sira. Edukasaun ida-ne’e kontribui maka’as tebes ba dezenvolvimentu ami nia karakter, orienta ami ba moris ida ne’ebé bazeia ba respeitu, onestidade, no domin ba ami nia maluk.
Hodi graduado sira hotu nia naran iha ami nia turno ba tinan academico 2025, ho domin boot ami hakarak hato’o ami nia agradesimentu neebe klean ba aman inan sira hotu neebe sustenta no tulun ona ami durante ami nia caminhada ida nee em termos de espiritual no material. Ho domin boot agradece mos ba professores neebe oferece ona mai ami academicamente nebe suficiente no laos naton deit ba nee, maibe ba formasaun mos, no mos equipa formadora no responsável sira hotu hahu husi seminario , internato masculino , internato feminino ba acompanhamento no dedicação tomak durante ami nia estudo no mos formação sira hotu.
Iha biban kmanek ida nee mos ami ho haraik aan ami husu perdaun ba ami nia fraqueza sira no buat hotu nebe halo imi iha emosaun hodi fo sai iha reasaun ruma. imi nia reasaun nebe hatudu, hafalun-an hela ho domin mai ami finalista sira.
No husi reasaun nebe ami simu ami sente hanesan kbiit ida, nebe halo ami cresce liu tan iha ami nia processo tomak e ao mesmo tempo halo ami iha forsa hodi luta nafatin e hodi ida ne’e mak oras ne’e ami bele sai hanesan graduados ba cerimonia graduacao ida ne’e.
Ikus ba hau nia belun graduados sira, momento ida ne’emak ninin no rohan ona ba ita nia hamutuk iha colegio maliana, tanba ne, mai ita ida idak tau ba iha ita nia hanoin e liuliu iha ita nia fuan katak, maske hau termina ona hau nia viajen iha colegio maliana maibe colegio maliana sei la termina iha hau nia an. Kuda ba experiencia no valor sira hotu iha ita nia an hodi sai nuudar bukae ida ba ita nia moris.
Muito obrigado e Desculpa.
By-Selvi Media Colégio Maliana
Leave a Reply