Sai Santo iha Moris Lorloron

Sai Santo iha Moris Lorloron
Reflexão Festa Todos Os Santos

“Maromak bolu ita ba santidade laos tamba ita perfeito, maibe tamba ita Maromak Nian”

1. Celebração Konaba Ita Nia Moris

Tintinan Iha dia 1 de novembro, Santa Creda iha mundo tomak celebra Festa Todos Os Santos- loron especial atu ita bele fo honra ba ema hotu nebe moris ona iha domin no fidelidade ba Maromak. Sira balun ita conhece hanesan santo no santa; sira barak seluk moris simples, naran ema lahatene, maibe sai santo iha sira nia moris lorloron liu hosi sira nia fidelidade, honestidade no iha domin nebe concreto.
Celebração ida nee fo hanoin  fali ba ita katak santidade laos deit iha altar, maibe mos iha ita nia moris lorloron, iha sala de aulas sira, iha kantor, iha knaar fatin sira, iha natar laran, iha mercado no iha uma.
Santidade laos konaba distancia, maibe konaba ita nia maneira moris lorloron.

2. Santidade: Identidade, Laos Premeio

Iha Carta Primeiro são João nian dehan:
“Ita Maromak nia oan, no ita Maromak nia oan duni” (I Jo 3,1)

Ida nee mak chave santidade: laos premio depois de moris santo, maibe identidade nebe moris no sulin hosi Sacramento Batismo. Ita sai santo laos tamba ita makaas –hebat, maibe tamba Maromak hili ona ita sai Ninian Rasik. Santidade laos konaba sai ‘imaculada – sem pecado’, maibe moris iha Domin Maromak nian no hakarak atu muda aan beibeik. Cada momento sira nebe ita hamrik hosi ita nia sala no fila ba Maromak, ita nia santidade buras tan oituan.

3. Santo Sira: Ema Nebe Uluk Mos Monu

Iha livro apocalipse, São João haktuir katak, nia hare ema lubun boot nebe ‘hatais roupa mutin no kaer oliveiras sanak iha sira liman’. Sira laos anjo, maibe sira ema sala nain, nebe fase mos sira nia hatais iha Bibi Oan Nia Ran. (Apocalipse 7,14).

Nee katak:
Ema santo sira nee laos ema nebe kanek laiha, maibe ema sira nebe husik Maromak atu cura sira nia kanek. Santidade la dehan katak nunca sala; Santidade katak la para hakaas aan atu sai diak liu.

4. Dalan ba Santidade: Rahun Diak

Iha Evangelho São Mateus capitulo 5, Jesus hatudu hela dalan ba santidade – Rahun Diak (em a venturada).

Jesus la dehan:
Rahun diak ba ema riku, conhecido no sucesso sira!

Maibe Jesus dehan:
“Rahun diak ba hirak nebe kiak iha Maromak Futar oin, sira nebe kbiit laek no lori dame”.

Ida nee duni mak espiritualidade santidade nian:
– Laos konaba posição, maibe konba ita nia disposição;
– Laos konaba ema atu gaba, maibe konaba ita nia atendimento ba ema seluk;
– Laos konaba força, maibe konaba domin nebe mamar.

5. Sai Santo iha Mundo Concreto

Loron ida ohin, Maromak la bolu ita atu sai santo no santa hanesan estatua, maibe bolu ita sai sasin domin nian iha mundo concreto. Santidade loron ohin nian, katak:
– Sincero iha ema barak nia leet nebe la honesto;
– Perdua wainhira ema hakanek ita;
– Fiel mesmo que ema seluk la hare;
– Hili lia los, mesmo que ho nia consequência ita lao mesak;
– Estuda laos atu hatudu aan, maibe atu bele sai bênção;
– Usa liberdade laos tuir ita nia hakaran rasik deit, maibe atu bele servi ema seluk;
– Sai Lideres ida nebe haraikaan, laos ukun nain ida nebe kan poder no respeito.

Ita bele sai santo la precisa lao dok hodi buka, naton deit ita husik Maromak hamotuk ho ita, iha ita nia moris lorloron.

6. Santidade nee Possível

Ema ididak iha nia dalan rasik ba santidade. Iha ema balun nebe sai santo liu hosi oração. Iha ema seluk nebe sai santo liu hosi nia serviço social caritativos sira. Iha ema seluk nebe sai santo liu hosi paciência iha nia terus sira.
Importante liu mak laos ita nia serviço nee boot ou kiik, maibe ita nia fuan nebe mos iha Maromak nia oin.

Tan nee, iha loron boot Festa Santo Sira Hotu nian nee, mai ita harohan atu ita mos bele lao tuir dalan nebe hanesan, dalan santidade nian:

• Laos atu ema conhece, maibe atu sai bênção ba ema seluk;
• Laos atu sai makaas, maibe atu fiel;
• Laos atu ema gaba ita, maibe atu lori Maromak nia domin ba ema seluk.

Tamba santidade laos presente depois de ita mate, maibe modus de viver – maneira moris ida nebe halo mundo ida nee atu sai hanesan Lalehan.

“Rahun daik ba sira nebe laran mos, tamba sira sei hare Maromak (Mat 5,8).

Colégio Maliana, 31 de outubro de 2025
Pe. Norberto Soares – Diretor Colégio Maliana